Po bëhen dhjetëra orë që asnjë kamionë me mallra kosovare apo me targa nga Kosova, nuk po vjen këtu në pikën kufitare në Merdarë.
Kjo pasi që disa kilometra larg, serbët kanë vendosur barrikada me qëllim të mos lejojnë kalimin e mallrave kosovare për në territorin serb.
Ky veprim ka ardhur gjashtë ditë pasi qeveria ndaloi hyrjen e mallrave serbe në Kosovë.
Moslejimi hyrjes së këtyre mjeteve në territorin tonë, e kishte lënë këtë shofer kosovar, bashkë me tre shokë të tij që gjashtë ditë në territorin e Serbisë.
Eskalimi i situatës në fshatin Rudarë dhe siguria e brishtë bëri që ata së bashku t’i lënë mallrat e tyre dhe në këmbë të dalin nga pika kufitare në Merdarë.
Ani se në numër shumë më të vogël, qarkullimi i automjeteve nga Serbia në Kosovë, po është i zakonshëm.
Veçse policia është duke i kontrolluar në secilin detaj.
Ky serb thotë se protestuesit nuk kanë asnjë problem me veturat, por me kamionët dhe mallrat nga Kosova.
E për të shkuar për në Shqipëri për pushime verore, Kosova dhe Serbia po përdorën si rrugë tranzit nga disa të huaj.
“Jam duke shkuar në Shqipëri. Po vij nga Gjermania. Rruga nuk kishte ndonjë problem. Gjithçka ishte e qetë”, tha një udhëtar.
Derisa, edhe pse të rrallë në numër – kalimi i mallrave për në Kosovë, po bëhet me mauna me mallrave të shteteve tjera – përveç atyre nga Serbia.
Pasdite Ministria e Punëve të Brendshme ka njoftuar se rrugët janë të lira për qarkullim.
Ndërkohë raportet mes Kosovës e Serbisë u tensionuan pas trazirave në veri.
Kronika e gazetarit Arton Rama.
