Gazetari dhe aktivisti Mehdi Mulaj është vlerësuar me çmimin ndërkombëtar “Ambasador i Paqes”, nga Federata Universale e Paqes. Lajmin e ka bërë të ditur vetë Mulaj përmes një postimi në rrjetin social Facebook.
Në shkrimin e tij, Mulaj ka theksuar se ky çmim është një nder dhe një motivim i madh për të vazhduar punën në shërbim të komunitetit dhe paqes.
“Të jesh paqësor nuk është dobësi, por virtyt! Në kohën kur bota është përfshirë nga luftërat, unë vlerësohem e nderohem nga Federata Universale e Paqes me çmimin ‘Ambasador i Paqes’,” ka shkruar Mulaj.
Ai ka shtuar se shpeshherë kontributi i individëve në komunitet nuk vlerësohet sa duhet, por ky nderim i ka dhënë forcë dhe bindje se paqja është e vetmja rrugë për të shpëtuar botën.
“Ky çmim më nderon, më forcon e më bind se vetëm paqja e shpëton botën. Faleminderit përzemërsisht të gjithë atyre që më propozuan dhe më vlerësuan për këtë çmim me karakter ndërkombëtar!,” ka shkruar tutje ai.
