Ministri i Mbrojtjes, Armend Mehaj, e ka pritur sot në takim ambasadorin e Britanisë së Madhe, Nicholas Abbott.
Përmes një postimi në Facebook, Mehaj ka shkruar se gjatë takimit kanë diskutuar për situatën e sigurisë në veri të vendit si dhe për nevojën për normalizimin e gjendjes atje, përcjell teve1.info.
“Gjatë takimit diskutuam për situatën e sigurisë në veri të vendit tonë si dhe nevojën për normalizimin e gjendjes. Ambasadori Abbott shprehu shqetësimin e tij për gjendjen në veri të vendit dhe nevojën për gjetjen e një rrugëzgjidhje për të kthyer normalitetin, për të mirën e të gjithë qytetarëve të vendit por dhe të partneritetit në mes Kosovës dhe vendeve të NATO-s”, thuhet në postimin e Mehaj.
Mehaj tha se ambasadorin Abbott e siguroi që Ministria e Mbrojtjes dhe FSK-ja është duke zhvilluar aktivitetet në përputhje me planet e saj të zhvillimit dhe nuk është e përfshirë në aktivitete që janë jashtë fushës së saj të veprimit.
“Diskutuam për bashkëpunimin me Britaninë e Madhe dhe vendet partnere të NATO si dhe mbështetjen e vazhdueshme që Britania dhe vendet partnere po japin për FSK-në, zhvillimin e saj dhe ndërtimin e kapaciteteve në përputhje me standardet dhe doktrinën e NATO-së”, thuhet tutje./teve1.info/.
