Në Kuvendin e Kosovës, sot disa nga deputetët janë përleshur mes vete. Derisa kryeministri, Albin Kurti ishte duke folur në foltoren e Kuvendit, ai është sharë dhe ofenduar nga deputetet e opozitës.
Rreth këtij zhvillimi kanë raportuar edhe mediat e huaja si Reuters e BBC.
Reuters ka raportuar për dhunën në Kuvend, teksa ka publikuar edhe video, përcjell teve1.info
”U hodhën grushta dhe kryeministri i Kosovës u lag me ujë teksa shpërtheu një përleshje në parlamentin e vendit“, nis teksti i BBC.
Sipas pamjeve të kamerave shihet se deputeti i PDK-së, Mërgim Lushtaku shkon drejt foltores së Kuvendit, ku ishte duke folur kryeministri Kurti, e të cilit i hodhi ujë.
Pas kësaj ka reaguar ministri i Financave, Hekuran Murati për ta ndaluar, e Bislimi e ka gjuajtur me një shishe Lushtakun.
Në përleshje përfshihen edhe deputetë tjerë të PDK-së, ku nga pamjet shihet se Hajdar Beqa e godet ministrin Murati dhe shtynë ministren Albulena Haxhiu.
Kjo përleshje ka bërë që seanca të ndërpritet e të vazhdojë përsëri.
Përleshje ka pasur përsëri edhe në pjesën e dytë të seancës. /Teve1.info/
