Më 3 dhjetor 2025, Ministrat e Jashtëm të vendeve anëtare të NATO-s do të takohen në Bruksel për të shqyrtuar progresin e arritur që nga Samiti i Hagës në qershor dhe për të nisur përgatitjet për Samitin e radhës të krerëve të shteteve dhe qeverive aleate, i paraparë të mbahet në Ankara më 7–8 korrik 2026.
Sipas një zyrtari të lartë të NATO-s, i cili foli pas një takimi informues me gazetarë nga Ballkani Perëndimor, Rusia, Ukraina dhe Moldavia, axhenda ministrore do të fokusohet në kërcënimet aktuale të sigurisë, veçanërisht në sjelljen gjithnjë e më të pamatur të Rusisë përgjatë krahut lindor të Aleancës.
Ai rikujtoi se pas shkeljes së hapësirës ajrore mbi Poloni nga dronët rusë në shtator, NATO aktivizoi operacionin Eastern Sentry, që sipas tij i ka shtuar fleksibilitet dhe forcë qëndrimit mbrojtës të Aleancës në Detin Baltik dhe në gjithë lindjen.
Ministrat pritet të diskutojnë edhe mbështetjen e vazhdueshme për Ukrainën, duke përfshirë takimin e Këshillit NATO–Ukrainë me Ministrin e Jashtëm të Ukrainës, Andrii Sybiha, dhe Përfaqësuesen e Lartë të BE-së, Kaja Kallas.
“Siguria e Ukrainës është e lidhur ngushtë me atë të Aleancës,” theksoi zyrtari, duke shtuar se është jetike që Kievi të marrë ndihmën ushtarake urgjente për të mbrojtur veten dhe për të penguar agresionet e ardhshme.
Ai përmendi gjithashtu rolin kyç të komandës në Wiesbaden, që merret me Ndihmën dhe Trajnimin e Sigurisë për Ukrainën, si dhe Listën e Kërkesave me Prioritet për Ukrainën (PURL), e cila mundëson pajisje nga rezervat amerikane me financim nga aleatët e NATO-s.
Një tjetër pikë e rëndësishme e diskutimit do të jetë situata në Ballkanin Perëndimor, të cilën Aleanca e konsideron zonë me rëndësi strategjike në kontekstin e zhvillimeve gjeopolitike.
Teve1 është mediumi i vetëm nga Kosova që po merr pjesë në këto takime të mbyllura për publikun, dhe do të përcjellë zhvillimet nga tre ditët e ardhshme të punimeve të Ministrave të Jashtëm të NATO-s./Tëvë1.info/
