Kështu ka njoftuar Ministria e Industrisë, Ndërmarrësisë dhe Tregtisë duke thënë se pjesë e operacionit ishin edhe Krimet Ekonomike të Policisë së Kosovës.
“Inspektorati i Tregut mbyll dy depo të operatorëve ekonomikë. Gjatë aksionit të sotëm të Ministrisë së Industrisë, Ndërmarrësisë dhe Tregtisë, konkretisht Inspektorati i Tregut në bashkëpunim me Drejtorinë për Hetimin e Krimeve Ekonomike të Policisë së Kosovës, janë mbyllur përkohësisht dy depo të operatorëve ekonomikë (në Fushë Kosovë dhe Graçanicë)”, thuhet ndër tjerash në postim.
Ndryshe, Prokurori i Shtetit në bashkëpunim me Policinë e Kosovës dhe Inspektoratin e Tregut ka njoftuar se do t’i ndërmarrë veprimet ligjore penale ndaj të gjithë personave përgjegjës apo bizneseve të cilat padrejtësisht kanë ngritur çmimet e artikujve ushqimor.
Reagimi i Zyrës së Kryeprokurorit të Shtetit erdhi pasi ministrja e Drejtësisë, Albulena Haxhiu, i bëri thirrje Prokurorit të Shtetit për hetimin e abuzuesve.
“Zyra e Kryeprokurorit të Shtetit, njofton opinionin publik se Prokurori i Shtetit në bashkëpunim me Policinë e Kosovës si dhe organet tjera kompetente, përkatësisht Inspektoratin e Tregut do t’i ndërmarrë veprimet ligjore penale ndaj të gjithë personave përgjegjës të organizatave të biznesit që ushtrojnë veprimtari ekonomike duke e keqpërdorur pozitën monopoliste apo dominuese në treg, të cilët në mënyrë të drejtpërdrejtë apo të tërthortë ndikojnë në vënien e çmimeve të padrejta të shitjes së artikujve ushqimor apo që në ndonjë mënyrë tjetër të padrejtë rregullojnë çmimet e blerjes apo të shitjes së mallrave, siç parashihet me nenin 295 të Kodit Penal të Republikës së Kosovës, ku është paraparë dënimi me burg dhe me gjobë”, thuhet në komunikatën për media të Zyrës së Kryeprokurorit të Shtetit.
Ndërkaq, gjatë së enjtes në disa markete në vend është parë se ka pasur rritje të çmimeve të vajit ushqimor deri në 3.49 cent për litër./teve1.info/.
