Policia e Kosovës ka njoftuar se që nga fundi i muajit prill të këtij viti ka realizuar disa aksione duke kontrolluar mbi 40 lokale të dyshuara për organizim të skemave piramidale dhe bixhozit të paligjshëm, 22 prej të cilave janë mbyllur.
Siç bëhet e ditur në njoftim, gjatë aksioneve janë verifikuar qindra persona dhe janë arrestuar 19 persona të dyshuar ndaj të cilëve është iniciuar rast.
Aksioni i fundit thuhet se është realizuar të mërkurën në Podujevë, në dy lokale të ndryshëm, ku në lokalin e parë janë gjetur dhe sekuestruar 5 aparate të lojërave të fatit, para të gatshme, si dhe është arrestuar një person.
Ndërsa në lokacionin e dytë sipas Policisë është gjetur sasi e narkotikëve dhe një thikë.
“Policia e rajonit të Prishtinës në kuadër të punës së saj për parandalimin e veprimtarive kriminale që po i sjellin dëme shoqërisë, ka intensifikuar veprimet e saj në drejtim të ndalimit të Organizimit të skemave piramidale dhe bixhozit të paligjshëm”, theksohet në njoftim.
