Sportet si Beach Volleyi, Shahu, Futsalli, Pingpongu, Basketbolli 3×3 dhe Tenisi nga sot do t’i zhvillojnë aktivitetet e tyre edhe në formën e ligave në kuadër të garave universitare, duke u bërë kështu ky edicioni i tretë i zhvillimit të këtij formati
Kjo është bërë e mundur nga bashkëpunimi ndërmjet Komitetit Olimpik të Kosovës dhe Federatës së Sporteve Universitare të Kosovës.
Kryetari i Federatës së Sporteve Universitare, Musa Selimi, theksoi se qëllimi kryesor i këtyre garave është masovizimi i sportit duke nisur nga shkalla universitare duke bërë të mundur që përmes këtij aktiviteti të dalin në pah edhe emra që mund të shkëlqejnë në një të ardhme të afërt për Kosovën.
“Sot në regjistrimin e tyre i kemi rreth 600 garues që gjatë tre muajve të ardhshëm do të garojnë me shpirtin e tyre, me motivin e tyre shtesë të cilët e kanë kuptuar drejtë se roli i sportit de lëvizja është mjet për jetesë që na ndihmon në zhvillimin dhe avancimin edhe profesional edhe akademik. Prandaj, më këtë rast dua të nënvizoj që këto gara do të sjellin edhe fituesin më të mirë, do të sjellin kampionët në Ligat Universitare që do të shpërblehen me shumat të cilat i ka përcaktuar Federata e Sporteve Universitare të Kosovës”, ka thënë Selimi.
Rëndësinë e këtij aktiviteti e theksoi edhe Presidenti i Komitetit Olimpik të Kosovës, Ismet Krasnqi. Ai tha studentët e universiteteve sportive janë ata që frymëzojnë gjeneratat pasuese për t’u marrë me sport dhe kjo pastaj krijon një zakon të shëndetshëm të angazhimit aktivitete të tilla. Ai siguroi se Komiteti Olimpik i Kosovës do të garantojë mbështetje për studentët dhe të gjithë ata që gjejnë hapësirën për organizime të tilla.
“Sot po shihet që shumë studentë e shumë sportistë janë të pranishëm, edicioni i tretë çdo vit më i madh e më i madh dhe kjo më bën mua krenar si kryetar i Komitetit Olimpik të Kosovës që kam president të tillë që bëjnë organizime të ndryshme të këtij lloji. Kjo ndikon posaqërisht në ngritjen e nivelit të sportit në Kosovë dhe në promovimin e vlerave olimpike në të gjithë Kosovën”, deklaroi Krasniqi.
Kurse përfaqësuesi i Ministrisë për Sport, Fidan Shatri tha se të gjithë studentët kanë nevojë për më shumë aktivitete fizik sepse aktiviteti fizik, sipas tij, është pararojë e lirisë.
“Kemi nevojë për punë edhe më të madhe duke e ditur që sporti universitar në çfarë niveli ka qenë, në çfarë stadi ka ardhur dhe atë se ku do të shkojë, edhe si ministri kemi obligim që të jemi syqelë karshi Federatës së Sporteve Universitare sepse në botën universitare studentët e universiteteve të Prishtinës por edhe të gjithë andej Kosovës kanë nevojë për aktivitet fizik sepse aktiviteti fizik të bën të ndihesh më mirë dhe aktiviteti fizik edhe i popullit por edhe i studentëve është si një pararojë e lirisë të cilën ne e gëzojmë sot”, theksoi Shatri.
Në këto gara, për rreth tre muaj do të marrin pjesë 600 garues në kategoritë e meshkujve dhe të femrave, derisa kampionët e këtyre ligave në fund të marrin pjesë edhe në një garë të përbashkët me klubet nga Shqipëria.
