Procesi i regjistrimit të votuesve jashtë Kosovës për zgjedhjet e 7 qershorit po vazhdon, ndërsa afati për aplikim do të përfundojë më 17 maj.
Zëdhënësi i Komisionit Qendror të Zgjedhjeve, Valmir Elezi, ka bërë të ditur se deri tani janë pranuar mbi 59 mijë kërkesa për regjistrim nga diaspora.
“Në bazë të të dhënave, nga fillimi i këtij procesi dhe deri më tani (e martë, 12 maj 2026, ora 10:00, përmes platformës elektronike http://diapsora.kqz-ks.org
janë pranuar 59,415 kërkesa për regjistrim, prej të cilave janë aprovuar 49,493, ndërsa 4,944 të tjera janë refuzuar dhe 4,957 janë në pritje për shqyrtim”.
Ai ka sqaruar edhe mënyrat e votimit që kanë zgjedhur qytetarët e regjistruar deri më tani.
“Nga 49,493 aplikime të aprovuara, 11,782 shtetas të Kosovës janë regjistruar për të votuar fizikisht në përfaqësi diplomatike, 1,325 janë regjistruar për të dërguar pakon me fletëvotim në kutinë postare të KQZ-në në Kosovë dhe 36,386 janë regjistruar për të dërguar pakon me fletëvotim në kutinë postare jashtë Kosovës”, deklaroi Elezi.
Sipas tij, numri më i madh i votuesve të regjistruar vjen nga shtetet evropiane, me Gjermaninë që prin në listë.
“Shtetet me numrin më të madh të votuesve të regjistruar janë: Gjermani (24,624), Zvicër (11,063), Francë (2,172), Suedi (2,058), Austri (1,508) dhe Mbretëri e Bashkuar (1,337), ShBA (1,115) dhe Itali (1,046)”./teve1.info/
