I ka 80 vjet.
Por mosha nuk e pengon Raif Krasniqin të vozitë makinën.
Për të qenë korrekt në aspektin ligjor, pensionisti nga Prishtina i kryen kontrollet mjekësore çdo gjashtë muaj.
Andaj me makinën e tij ai merr rrugë edhe jashtë Kosovës.
“Me vozitë voziti shumë mirë. S’kam problem as me sy as me kurgjë. Udhëtoj shkoj në Shqipëri dy herë në vit rregullisht. Kam bo kontrolla kur e kam vazhdu lejen, tash bëj kontrolla çdo gjashtë muaj, s’kam problem me shëndet, jam shumë në rregull”, thotë ai.
E të moshuarve, leja e vozitjes i vazhdohet për një kohë të caktuar, varësisht nga gjendja e tyre shëndetësore.
“Vijnë varësisht kur iu del afati i patentë-shoferit. Janë kontrollat- neuropsikiatri, psikologu familjar, oftamologu edhe këto varësisht prej gjashtë muaj deri në pesë vjet vazhdohen, varet tash nëse e ka për dy vite, vjen pas dy viteve, por zakonisht iu vazhdohen deri në pesë vite, varet prej gjendjes shëndetësore të palës”, bën të ditur Miradie Statovci, drejtoreshë në poliklinikën Galaxy.
Sipas të dhënave të siguruara nga tëvë1 në Ministrinë e Punëve të Brenshme, mbi 55 mijë persona mbi moshën 65 vjeçare vazhdojnë të jenë të regjistruar me patentë-shoferë.
Por ka prej tyre të cilët kanë pësuar aksidente në trafik.
Madje pasojat në disa raste kanë qenë edhe me fatalitet.
Sipas Policisë së Kosovës, vetëm në vitin 2022 kanë qenë 95 aksidente trafiku me fatalitet.
Ndërsa rreziku më i lartë sipas ekspertit të komunikacionit, Nol Dedaj është për të moshuarit.
“Ka raste që i kam shqyrtu, ku kam thanë sa pak i duhet një të moshuari një kontakt shumë i vogël për të ardhë deri te fataliteti. Pastaj kemi pasë edhe në automjete ka humb drejtimin, ka bërë ndeshje edhe gjatë shqyrtimit edhe koha e reagimit të tij ka qenë 1.8”, theksoi Dedaj.
Dedaj shton se shteti duhet kushtuar infrastrukturë të duhur ligjore pensionistëve për vozitje.
“Mirë është që shteti me u marrë me këta njerëz, shteti duhet me u marrë me ju kushtu infrastrukturë ligjore, pastaj edhe ne do ta kemi sigurinë. Edhe për sigurinë e tyre shëndetësore por edhe për siguri të komunikacionit të përgjegjshëm”, shtoi ai.
Në Kosovë vetëm gjatë vitit 2022 janë shqiptuar mbi 645 mijë gjoba trafiku.
Kronika e realizuar nga gazetarja Albiona Hajdari.
