Siguria në trafikun e Prishtinës po mbetet ende një sfidë.
Kjo pasi në rrugët e kryeqytetit, po qarkullojnë automjete të shumta pa regjistrim e pa kontrolla teknike.
Vetëm gjatë dy javëve të para të këtij viti, Policia e Kosovës evidentoi 353 automjete të paregjistruara në rajonin e Prishtinës.
Sipas Policisë, këto automjete po paraqesin rrezik të drejtpërdrejtë për sigurinë në trafik.
“Përveç tejkalimit të shpejtësisë, sidomos në kushtet e dimrit, nga statistikat e grumbulluara, sfidë mbetet një numër i madh i automjeteve të paregjistruara, gjithsej 353, gjë kjo që paraqet një problem serioz për sigurinë në trafik, pasi këto automjete qarkullojnë në rrugë pa kontrollim teknik”, thuhet nga Policia e Kosovës.
Njohësi i komunikacionit Lavdim Hamiti thotë që këto vetura nuk janë në gjendje të rregullt përderisa janë të paregjistruara.
“Problemi këtu qëndron sepse janë mjete që janë në rrugë, por nuk iu dihet gjendja e tyre ndërsa sa i përket kompanive të sigurimit është edhe një barrë për ta pasi që nëse vjen deri të aksidenti barrën e merr një kompani që është shtetërore për dëmet që i bën pasi që ai s’ka sigurim dhe si palë e tretë nuk mund të marrë përsipër një kompani e sigurimeve nëse vetëm ndodh aksidenti”, thotë ai.
Këto automjete, sipas Hamitit, janë një rrezik i madh për komunikacionin.
“Nëse një veturë është e paregjistruar për shkak të një kontrolle teknike që nuk ka mund të kalojë për shkak të gabimeve apo gjendjes së veturës, atëherë ajo veturë është e rrezikshme në komunikacion sepse mund të vijë deri te një frenim jo i vrullshëm apo shumë i lehtë por mund të vijë deri te një aksident që mund të shkaktojë ajo veturë dhe si shkak i gjendjes teknike jo adekuate po vjen deri të një aksident”.
Televizioni ka tentuar të marrë një përgjigje edhe nga Byroja Kosovare e Sigurimeve për të marrë shifra rreth numrit të automjeteve të paregjistruara, por të njëjtit nuk kanë kthyer përgjigje.
Ndërkaq, përgjatë kësaj periudhe dyjavore, Policia ka bërë të ditur se janë shqiptuar 1 mijë e 883 gjoba për kundërvajtje të ndryshme në trafik.
Autoritetet policore gjithashtu u kanë bërë apel drejtuesve të automjeteve që të respektojnë rregullat e trafikut, duke paralajmëruar se kontrollet do të vazhdojnë edhe në ditët në vijim.
Kronikë e realizuar nga gazetarja Jona Kelmendi.
