Ministria e Arsimit dhe Shkencës ka reaguar pas raportimeve për një rast të dyshuar të ngacmimit seksual në një institucion arsimor në Gjakovë, duke theksuar se çdo formë e abuzimit dhe keqpërdorimit të pozitës në shkolla është e papranueshme.
Sipas njoftimit zyrtar, Inspektorati i Arsimit ka ndërmarrë veprime menjëherë pas pranimit të informatave, duke kontaktuar Policinë e Kosovës dhe Drejtorinë Komunale të Arsimit në Gjakovë për të siguruar detaje lidhur me masat institucionale të ndërmarra.
Nga informacionet e pranuara, Komisioni disiplinor ka vendosur pezullimin e drejtorit të institucionit arsimor nga detyra dhe marrëdhënia e punës.
MASht-i ka theksuar se shkollat duhet të mbeten ambiente të sigurta për nxënësit dhe se çdo rast që cenon dinjitetin dhe integritetin e të miturve duhet të trajtohet me seriozitet të plotë nga institucionet përgjegjëse.
Ministria ka kërkuar që procedurat të zhvillohen me profesionalizëm dhe në përputhje me ligjin, deri në zbardhjen e plotë të rastit.
Ndryshe, Drejtoria Komunale e Arsimit në Gjakovë ka bërë të ditur se drejtori i shkollës Shkolla “Pjetër Bogdani” në Demjan është suspenduar pas dyshimeve për ngacmim seksual ndaj një nxënëseje 17-vjeçare. Sipas DKA-së, rasti po trajtohet në koordinim me Policinë dhe Prokurorinë.
