Ditën e nisi te ndërtesat e socialit në Hajvali të Prishtinës.
Kryeministri në detyrë, Albin Kurti bashkë me ministren në detyrë të Ekonomisë, përfaqësues nga Bashkimi Evropian dhe Fondi i Kosovës për efiçiencë të Energjisë prenë shiritin te kjo ndërtesë.
Aty u përfunduan si pjesë e projektit “Zbatimi i masave të efiçiencës së energjisë në ndërtesat shumë-banesore sociale”.
Kurti u shpreh se me këto ndërhyrje, secila prej banesave ka edhe klimën ku do t’i kenë verërat e freskëta e dimrat e ngrohtë.
“Me ç’rast i kemi 100 familje këtu në Hajvali, në këto dy ndërtesa në mes të cilave ndodhemi ne sot këtu dhe gjithashtu edhe 100 të tjera atje tek Medreseja. Këtu kursimi i energjisë elektrike është gati 50 për qind, në njërën është 47 për qind, në tjetrën është 45 për qind, në gjithë Kosovën 28 ndërtesa sociale, pra këtu janë vetëm çka kemi parë sot, janë vetëm 4 nga 28, në 13 komuna edhe janë mbi 6 milionë euro investime”, tha Kurti.
E ministrja në detyrë e Ekonomisë, Artane Rizvanolli u shpreh se janë mbi 880 familje përfituese nga këto investime.
“Synimi është të projekti të zgjerohet edhe në banesa të tjera dhe tashmë ndjehemi krenar që Fondi i Kosovës për Efiçiencë të Energjisë që ka qenë praktikisht jo funksional para 3-4 vitesh, tashmë është në gjendje të menaxhojë projekte të tilla komplekse dhe gjithnjë më komplekse”, tha ajo.
Nga Zyra e BE-së në Kosovë, Alessandro Bianciardi tha se investimi në këtë ndërtesë është 540 mijë euro.
“Kjo është pjesë e pakos mbështetëse që është financuar nga Komisioni Evropian me 75 milionë euro dhe që është dizajnuar bashkë me Qeverinë e Kosovës dhe Fondin e Kosovës për Efiçiencë të Energjisë si implementues edhe të disa projekteve tjera që sjellin efiçiencë të energjisë”, u shpreh ai.
FKEE me një buxhet 6.5 milionë eurosh ka nisur një iniciativë për implementimin e masave të efiçiencës së energjisë në ndërtesa sociale shumë-banesore.
Pas përfundimit të përurimit, Kurti nuk iu përgjigj pyetjeve të gazetarëve rreth ngërçit politik.
