Flora Peci nga Mitrovica, për 9 orë dëshmoi kundër ish-politikanit serb, Oliver Ivanoviq.
Këtë të fundit, thotë se e pa mirë më 14 prill të vitit 1999 në Lagjen e Kovaçëve në Mitrovicë.
Atë ditë forcat serbe, në këtë vend vranë e masakruan 31 kosovarë.
Në mesin e tyre, ishte edhe vëllai i saj Afrimi dhe djali i axhës, Enver Peci.
Flora Pecit i kujtohen fjalët që ia tha Oliver Ivanoviqit, të cilat më pas dolën të vërteta.
“Avokati i tyre mundohej të më gjunjëzonte, të më mposhte duke bërtitur, por megjithatë dhe në ato momente i thashë që të betohem që unë jam dëshmitarja e fundit, dhe vërtetë isha dëshmitarja e fundit”, tha ajo.
Atë ditë, forcat serbe fillimisht e rrethuan këtë ndërtesë ku po banonin shqiptarët.
E kujtimet kur i nxorën me forcë nga aty, i ka të freskëta Tefik Sejdiu.
“Na kanë nxjerr shkallëve, në çdo vend u kanë nga një polic me armë…”, tha ai.
E pasi i nxorën nga këtu, 31 shqiptarët i vranë e masakruan në këtë vend në lagjen e Kovaçëve
Sejdiut i ka mbetur në kujtesë takimi i fundit me babain, axhën dhe kushëririn.
“Babi u dal poshtë, e kanë marrë edhe ata kryet i ka mbet kështu….edhe kur fol qysh i kanë rreh…”, tha ai.
Por, nga kush u ndihmua Oliver Ivanoviq në këtë masakër?
“Autorët e kësaj masakre ishin fqinjët tanë serbë”, tha Shadije Pllana – Hoti, familjare e viktimave.
E për të bërë homazhe tek vendi ku u vranë 31 shqiptarët, të enjten erdhi presidentja e Kosovës, Vjosa Osmani.
Ardhja e saj, duket se i gëzoi familjarët.
Ndërsa më pas, Osmani e shoqëruar nga kryetari i Mitrovicës, Bedri Hamza, bën homazhe tek pllaka përkujtimore.
Ndryshe, vet Oliver Ivanoviq, u vra me 16 janar të vitit 2018, në Mitrovicën Veriore.
Raporti i gazetarit Fidan Zejnullahu.
