“Kur jena nda na tha mos kani, se na jem meshkuj e përballojmë”.
Kështu i tha Skënder Hadërgjonaj motrave të tij në takimin e fundit para se të vritej nga forcat serbe.
Ai është në mesin e 376 civilëve të vrarë më 27 prill në Mejë të Gjakovës.
E Arbëria, përvec Skenderit i ka edhe dy vëllezër tjerë të zhdukur.
Në mesin e të vrarëve në këtë masakër është edhe Hasan Gaxheri nga fshati Junik.
Nëna e tij, Azize Gaxheri thotë se për tetë vite nuk dinte asgjë për të birin.
84 vjeçarja kujton se në atë kohë, djali i saj ishte vetëm 27 vjeçar.
Në momentet e fundit, ai ishte bashkë me dajën e tij.
Të dielën, homazhe në Kompleksin Memorial në Mejë bëri edhe kryeministri në detyrë, Albin Kurti.
Në masakrën e Mejës, 376 civilë shqiptarë u vranë e u masakruan nga forcat serbe.
Sikurse për shumicën e masakrave në Kosovë, as për këtë në Mejë, akoma nuk është dënuar askush nga organet e drejtësisë.
