Këshilli Studentor i Fakultetit të Filologjisë ka mbajtur një marsh në shenjë pakënaqësie dhe revolte ndaj menaxhmentit të UP-së, për rastin e profesorit, Bekim Bejta.
Ata kanë kërkuar nga menaxhmenti i UP-së përjashtimin e profesorit Bejta.
Senati i Universitetit të Prishtinës ka vendosur të mërkurën që ta suspendojë nga puna profesorin në Fakultetin Filologjik, Bekim Bejta.
Kështu ka bërë të ditur Lëvizja studentore “Studim Kritikë Veprim”, përcjell teve1.info
Sipas tyre, Bejta është suspenduar në një afat kohor prej gjashtë muajsh.
“Të nderuar studentë, sot me shumicë votash për, Bekim Bejta u suspendua nga Universiteti i Prishtinës për 6 muaj. Pikërisht në 13 vjetorin e themelimit të SKV-së, studentët senatorë nga radhët e lëvizjes sonë studentore votuan për suspendimin e Bejtës. Mbi kërcënimet, kanosjet e fyerjet e Bejtës fitoi vullneti i studentëve kundër shtypjes. Edhe këtë herë u dëshmua se roli i studentëve në parandalimin dhe luftimin e shkeljeve dhe padrejtësive është jetik në ndërtimin e një Universiteti të mirëfillt”, thuhet në njoftimin e tyre.
