Për liderët shtetërorë serbë marrëveshja e nënshkruar mes Serbisë dhe BE-së për shfrytëzimin e lëndëve të para dhe për prodhimin e baterive, po shihet si shumë fitimprurëse meqë prek vlerën e disa miliarda eurove.
Mirëpo, jo të gjithë në Serbi po pajtohen me këtë marrëveshje, madje një pjesë e qytetarëve serbë kanë paralajmëruar protesta për ta kundërshtuar këtë projekt.
Si tejet të dëmshme këtë marrëveshje për Serbinë po e vlerëson edhe gazetari investigativ nga Beogradi, Branko Cecen.
Cecen mes tjerash thotë se projekti për minierën e litiumit e dëmton mjedisin në Serbi.
“Kjo është një marrëveshje shumë e keqe për Serbinë dhe jo vetëm për faktin që e dëmton mjedisin, por edhe nga pikëpamja e demokracisë dhe e institucioneve demokratike sepse Serbia ka shkelur shumë ligje për këtë marrëveshje për litiumin. Do të dëmtohet mjedisi sepse nevojitet sasi e madhe e ujit për nxjerrjen e litiumit dhe këtu nuk po flitet fare për qytetarët që jetojnë në ato zona, ku supozohet të bëhet nxjerrja e litiumit dhe lëndëve të tjera. E ardhmja po duket shumë e apokaliptike për qytetarët e Serbisë”, thotë ai.
Ai është shprehur tejet kritik edhe ndaj Perëndimi për mënyrën se si e ka mbështetur politikisht presidentin autoritar serb, Aleksandar Vuçiq.
Cecen thotë se Perëndimi bën tregti në Serbi vetëm për interesat e veta duke nënvizuar këtu marrëveshjen e fundit për litiumin dhe lëndët e para.
“Për raportet e Perëndimit me Aleksandar Vuçiqin dhe regjimin e tij ju duhet t’i shikoni vetëm veprimet sepse veprimet flasin më së miri. Ky regjim është mbështetur fuqishëm financiarisht dhe politikisht nga Perëndimi gjatë 13 viteve sa Vuçiq është në pushtet. Vetëm për zgjedhjet e fundit ai u kritikua, por mos harroni se edhe zgjedhjet e tjera u manipuluan dhe ne nuk dëgjuam asgjë nga Perëndimi. Pra, Perëndimi në fakt e mbështet Vuçiqin dhe bën tregti për interesat e veta me të. Marrëveshja e fundit për litiumin është shembulli më i mirë për marrëdhëniet mes Serbisë dhe Perëndimit. Por tani rezistenca e qytetarëve serbë është aq e fortë sa që kjo do të ketë pasoja jo vetëm për Serbinë por për të gjithë ata që janë përfshirë në këtë”, pohon ai.
Miniera e Jadarit, pranë qytetit Loznica në Serbinë perëndimore, mban disa nga rezervat më të mëdha të litiumit në Evropë.
Litiumi vlerësohet si material thelbësor për prodhimin e baterive të makinave elektrike dhe për pajisjet celulare.