Orë vendimtare po kalojnë për stolin dhe projektin e Tiranës, ku në qendër të vëmendjes janë trajneri Orges Shehi dhe kapiteni i skuadrës, sulmuesi Redon Xhixha. Sipas zhvillimeve të fundit, nga dita e sotme pritet që të formalizohet rinovimi i kontratave të të dyve, një hap që konsiderohet thelbësor për vazhdimësinë e projektit bardheblu dhe stabilitetin e skuadrës në sezonin e ardhshëm. Drejtuesit e klubit kanë punuar prej kohësh për të mbyllur marrëveshjet, duke i parë Shehin dhe Xhixhën si dy elementë kyç të ekipit.
Në kampin e trajnerit, situata mbetet ende e hapur. Orges Shehi ka në tavolinë një ofertë konkrete nga FC Prishtina, që kërkon ta afrojë në pankinë si pjesë e një projekti të ri ambicioz. Klubi kosovar e sheh Shehin si një profil të përshtatshëm për të udhëhequr skuadrën drejt objektivave të larta, ndërsa vetë trajneri po e shqyrton me kujdes këtë mundësi, pa përjashtuar as vazhdimin në kryeqytetin shqiptar.
Nga ana tjetër, Redon Xhixha mbetet një nga lojtarët më të kërkuar në treg. Performancat e tij kanë tërhequr vëmendjen e disa skuadrave brenda dhe jashtë vendit, por pavarësisht interesimeve, sulmuesi duket i prirur të vazhdojë me bardheblutë.
Ai e sheh Tiranën si një projekt ku ka ende hapësirë për të lënë gjurmë dhe për të vazhduar si lider i repartit ofensiv. Tashmë mbetet të shihet në orët në vijim nëse do të zyrtarizohen rinovimet, apo nëse situata do të marrë një kthesë të papritur, sidomos në rastin e trajnerit, ku oferta nga Prishtina mund të ndryshojë ekuilibrat e projektit bardheblu për sezonin e ardhshëm.
