Tahiri ka thënë se edhe NATO duhet të pezullojë programet e veta për Serbinë dhe vendet e rajonit do të duhej të mos merrnin pjesë në takimet rajonale ku merr pjesë Serbia.
“Pas marrëveshjes mes Serbisë dhe Rusisë për konsultime në fushën e politikës së jashtme të nënshkruar në margjinat e #UNGA, BE-ja do duhej të pezullonte negociatat me Serbinë, NATO të pezullonte programet e veta, ndërsa vendet e rajonit do duhej të pezullonin takimet rajonale me Serbinë prezente”, ka shkruar Tahiri.
Ai ka thënë se kjo marrëveshje është fyerje e Serbisë ndaj ndërgjegjes së kombeve të lira.
Për këtë marrëveshje të nënshkruar në New York, nga ministri i Jashtëm serb, Nikola Selakoviq dhe homologu i tij, rus Sergei Lavrov, ka reaguar edhe raportuesja për Kosovën në Parlamentin Evropian, Viola von Cramon.
“Ky është një skandal i rëndë. Në mes të luftës së furishme Serbia nënshkruan planin për bashkëpunimin e ardhshëm me agresorin. Ose ndoshta është thjesht një sinjal për ne që të ngrijmë bisedimet e anëtarësimit pasi hyrja në BE nuk kalon përmes Moskës”, ka shkruar ajo./teve1.info./
