Boksieri shqiptar, Florian Marku ka treguar një ngjarje të trishtë në ceremoninë ku është nderuar me medalje “Ylli i Madh i Mirënjohjes” nga kryeministri i Shqipërisë, Edi Rama. Marku rrëfeu ngjarjen se si është gënjyer nga një promotor, pasi ai i kishte premtuar shumëçka në Angli, por që nuk mori asgjë, përcjell Tëvë1.
“Në Angli kam vajtur komplet rastësishtë, kam vajtur nga një promotor që më gënjeu, më premtoi më tha “hajde në Angli, do t’i kesh të gjithë gati, do e kesh shtëpinë të paguar, makinën, trajnerët dhe çdo gjë”, tha ai.
Boksieri shqiptar tregoi se ishte nisur për Angli, por me të arritur kishte kuptuar se gjithçka kishte qenë një mashtrim, por përkundër këtij fakti, ai asnjëherë nuk e kishte humbur shpresën.
“Mora nuse, atëherë nuk e kam pasur djalin, u nisëm me nusën për në Angli, kur arrita atje, çdo gjë ishte një mashtrim, as shtëpi, as makinë dhe asgjë. Por e kam pasur ëndërr të boksoja në Angli dhe neve nuk i kemi pasur mundësitë që ne të udhëtojmë lirshëm, prandaj për mua ishte fat që isha në Angli dhe thash s’ka problem, po rrimë, po ia nisim nga fillimi. U thash kam për ta mbushur stadiumin, dua një promotor dhe keni për të parë, asnjëri nuk besonte”, tha tutje ai.
