Ministri në detyrë i Mbrojtjes, Ejup Maqedonci, gjatë qëndrimit në Turqi ka zhvilluar një takim me Ministrin e Shtetit për Mbrojtje të Mbretërisë së Bashkuar, Lord Vernon Coaker.
Në një postim në Facebook, Maqedonci ka shprehur mirënjohje për mbështetjen e vazhdueshme të Mbretërisë së Bashkuar ndaj Kosovës, duke vlerësuar rolin e saj në proceset shtetformuese dhe në forcimin e institucioneve të sigurisë dhe mbrojtjes.
Ai ka thënë se në takim është diskutuar avancimi i bashkëpunimit bilateral në fushën e mbrojtjes, duke përfshirë edhe partneritetin në misione të përbashkëta në Ishujt Falkland dhe Belize, si dhe kontributin në operacionin “Interflex”.
Sipas Maqedoncit, të dy palët kanë ritheksuar përkushtimin për thellimin e bashkëpunimit në fusha si trajnimet ushtarake, zhvillimi i kapaciteteve dhe ndërveprueshmëria, me qëllim forcimin e paqes dhe stabilitetit rajonal e ndërkombëtar./teve1.info/
