Ministri në detyrë i Mbrojtjes, Ejup Maqedonci, ka pritur të enjten në takim Komandantin e Forcave Tokësore të Turqisë, gjeneral Metin Tokel, me të cilin zhvilloi një bisedë të frytshme rreth thellimit të bashkëpunimit ushtarak ndërmjet Republikës së Kosovës dhe Republikës së Turqisë.
Lajmin e ka bërë të ditur vetë ministri Maqedonci përmes një postimi në Facebook, ku theksoi se diskutimet janë fokusuar në avancimin e trajnimeve dhe ushtrimeve të përbashkëta, forcimin e bashkëpunimit në industrinë e mbrojtjes, si dhe mundësitë për prokurime të ardhshme ushtarake në përputhje me nevojat e Forcave të Armatosura të Kosovës dhe zhvillimet e reja teknologjike.
“Gjeneralin Tokel e falënderova për kontributin e vazhdueshëm të trupave turke në kuadër të misionit të KFOR-it, si dhe për mbështetjen e pandërprerë që Turqia i ka ofruar Kosovës që nga shpallja e pavarësisë. Turqia mbetet një partner strategjik dhe i çmuar për shtetin tonë”, ka shkruar Maqedonci.
