Zëdhënësi i Lëvizjes Vetëvendosje, Arlind Manxhuka ka shkruar se asgjë nuk ka ndryshuar me kohën kur kryeministri Albin Kurti e konsideronte Oliver Ivanoviqin kriminel lufte, shkruan teve1.info.
Sipas tij, ajo çfarë ka bërë Kurti, lidhet me vrasjen e dikujt që paraprakisht ka pasur shumë të tregojë për Serbinë, krimet në veri e bashkëpunimin me disa shqiptarë.
“Komunikata e VV-së ndaj dënimit të Ivanoviqit nuk është në kundërshtim me videon e djeshme, përkundrazi është avansim i asaj çka ne kemi deklaruar”, ka shkruar Manxhuka.
Ndryshe, në pesë vjetorin e vrasjes së Oliver Ivanoviqit Albin Kurti kishte thënë se ai “ishte person i përkushtuar për të luftuar për interesat e komunitetit të tij” dhe kishte porositur që “kujtimi për të të mbetej gjallë, kujtimi i tij si një njeri që punoi për një të ardhme të qëndrueshme dhe për një Kosovë shumë etnike”.
Ndërsa përmes një komunikate më 2016, VV e cilësonte dënimin e Ivanoviqit me 9 vjet si të vogël.
Oliver Ivanoviq kishte marrë pjesë në masakra ndaj civilëve në Kosovë dhe po ashtu njihej si ndër kryesorët e grupit paramilitar “Rojet e urës” në Mitrovicë.
