Me duar në pranga dhe nën përcjellje të policisë.
Kështu u sollën në gjykatën e Prizrenit, të dyshuarit për manipulimin e votave.
Fillimisht ndaj 23 prej tyre, Gjykata aprovoi kërkesën e Prokurorisë për caktim të masës së paraburgimit.
“Sot gjatë ditës, Gjykata Themelore ka pranuar disa kërkesa. Në total janë 23 persona për të cilët është kërkuar masa e paraburgimit. 21 të pandehur në cilësinë e komisionerëve, të dyshuar për veprën penale falsifikim i rezultateve të votimit. 1 i pandehur, komisioner, për dy vepra penale: falsifikim i rezultateve të votimit dhe marrje e ryshfetit. Dhe 1 i pandehur në cilësinë e vëzhguesit, për dy vepra penale: kanosje dhe dhënie e ryshfetit. Pra, në total 23 persona, të ndarë në disa kërkesa”, tha zëdhënësi i Gjykatës Themelore në Prizren, Marcel Lekaj.
Përreth Gjykatës gjatë gjithë ditës qëndruan edhe familjarë të të pandehurve, që prisnin vendimin.
Procesin e monitoroi edhe Avokati i Popullit, Nail Qelaj.
“Erdha në monitorim të njërës prej seancave në Gjykatën Themelore në Prizren. Qëllimi i këtij monitorimi është me pa se si po shkojnë procedurat, sa po zbatohen e respektohen standardet për qasje dhe një mundësi të drejtë për një procedurë ku garantohet edhe ndaj personave që janë të dyshuar. Mendoj se është njëra prej rasteve të rënda që ka ndodhur në Kosovë, por që apeli im është që edhe drejtësia duhet të jetë e kujdesshme që asnjë person i pafalshëm të mos jetë pjesë e një procesi ku mund të dëmtohet integriteti i tij”, tha Qelaj.
Deri tash, Qelaj thotë se kanë pranuar vetëm një ankesë nga ana e familjarëve.
Por si ndodhi keqpërdorimi i votave?
Në njërën nga kërkesat të siguruar nga Tëvë1, theksohet se të pandehurit kanë shtuar dhe hequr vota në mënyrë të paligjshme në disa vendvotime.
Sipas dosjes së Prokurorisë, vetëm një i pandehur i hoqi 448 vota, kurse i shtoi 311. Pra në total realizoi një ndryshim prej 759 votash.
“Nga CD e cila përmban shënimet zyrtare nga baza e të dhënave të siguruara nga KQZ-ja, si dhe nga formularët e procesit të numërimit të rezultateve të marra nga qendra e regjistrimit, shihet numri i saktë i votave të cilat këta të pandehur kanë hequr dhe kanë shtuar në favor të kandidatëve të për deputetë të subjekteve të ndryshme politike”, thuhet nga Dosja e Prokurorisë.
Në kërkesë, Prokuroria ka renditur disa arsye se përse të pandehurit duhet të mbahen për një kohë në paraburgim.
Disa nga to janë rreziku për asgjësim të provave, si dhe pasha e veprës penale e cila është vlerësuar e natyrës së rëndë.
Kronikë e realizuar nga gazetarja Adea Mustafaj.
