Në Gjykatën Themelore të Prishtinës ka nisur shqyrtimi gjyqësor ndaj të akuzuarës për spiunazh, Jelena Gjukanoviq.
Edhe sot ajo para trupit gjykues u deklarua e pafajshme për veprën penale me të cilën ngarkohet.
Shtetasja serbe dhe ish-punonjëse e Organizatës për Siguri dhe Bashkëpunim në Evropë (OSBE) tha se nuk ndihet fajtore për veprën me të cilën e akuzohet nga Prokuroria Speciale.
“Nuk ndihem fajtore”, tha ajo.
E akuzuara, Jelena Gjukanoviq dhe avokati i saj, Predrag Miljkoviq hoqën dorë nga e drejta për tu lexuar aktakuza pasi ajo ishte lexuar në seancën e shqyrtimit fillestar.
“Nuk kemi nevojë, njëherë e kemi lexuar”, tha ai.
Aktualisht shqyrtimi gjyqësor po vazhdon me fjalët hyrëse të të gjitha palëve.
Gjukanoviq, shtetase serbe dhe ish-punonjëse e Organizatës për Siguri dhe Bashkëpunim në Evropë (OSBE) dyshohet se ka qenë e përfshirë në aktivitete spiunazhi në bashkëpunim me një person tjetër, i cili gjithashtu është nën hetim nga autoritetet.
Ekzistojnë dyshime se ajo ka bashkëpunuar me Agjencinë Serbe të Sigurisë dhe Inteligjencës (BIA).
E akuzuara për spiunazh, Jelena Gjukanoviq edhe në seancën e shtatorit të vitit të kaluar nuk e kishte pranuar fajësinë në gjykimin fillestar i cili ishte mbajtur në Gjykatën Themelore në Prishtinë.
Gjukanoviq ishte arrestuar më 28 shkurt 2025 në pikën kufitare në Jarinje, dhe që atëherë ndodhet në paraburgim.
