Supergoli i Rodrit në pjesën e parë dhe golat e Bernardo Silvas dhe Erling Haalandit në të dytën i siguruan fitoren bindëse Manchester Cityt ndaj Bayernit.
City e Bayerni u takuan të martën mbrëma në “Etihad”, në ndeshjen e parë çerekfinale të Ligës së Kampionëve. Kampioni anglez fitoi me rezultatin 3:0. Kështu skuadra e Pep Guardiolas ka bërë hap të madh drejt gjysmëfinales.
Rodri në minutën e 27-të shënoi gol të bukur me goditje nga distanca. Të tjera raste kishte Manchester City në pjesën e parë, ndërsa në disa situata rrezikoi edhe Bayerni.
Kampioni gjerman e hapi më mirë pjesën e dytë, por nuk konkretizoi. Ndërkohë Bernardo Silva shënoi me asistim të Haalandit në minutën e 70-të. Golin e solli gabimi i Dayot Upamecanos në gjysmëfushën e Bayernit.
Një tjetër pakujdesi e Bayernit solli golin e tretë të Cityt. Haaland shënoi për 3:0 në minutën e 76-të. Ai shfrytëzoi pasimin e John Stones.
Ndeshja e kthimit luhet më 19 prill në Munih, por City është në situatë të favorshme për të kaluar në gjysmëfinale të Championsit.
Në sfidën tjetër, edhe Inter ia doli të merrte një rezultat mjaft shpresëdhënës në transfertë teksa mposhti me shifrat 0-2, Benficën.
Zikaltërit i gjetën dy golat në pjesën e dytë, fillimisht me Nicolo Barellën dhe më pas me Romelu Lukakun që nuk gaboi nga pika e bardhë e penalltisë. Në San Siro, Inter niset i qetë dhe me një këmbë në gjysmëfinalet e Champions League.
