Manchester City synon të vazhdojë ecurinë pozitive edhe në javën e dytë të Premier League. Në prag të supersfidës kundër Tottenhamit në “Ettihad Stadium” (sot, ora 13:30), trajneri Pep Guardiola preku disa tema në lidhje me skuadrën e tij e jo vetëm.
Fillimisht, spanjolli u ndal mbi situatën e lojtarëve të lënduar dhe të ardhmen e disa prej tyre, që janë konsideruar si “tepricë”.
“Sa I takon Rodrit dhe Foden, ata munguan në ndeshjen e fundit vetëm për shkak të ritmit dhe stërvitjes. Nuk ishin gati për 90 minuta kundër Wolves, por për ndeshjen e radhës janë në rregull. Do të mungojnë Kovacic, Gvardiol dhe Savinjo.
Rodri? Nuk kam dyshime për potencialin dhe cilësinë e tij. Aktualisht është ende lojtari më i mirë në botë”.
Në lidhje me portierin Trafford, Pep tha: “Jam i kënaqur me të. Lojtarët e rinj sjellin gjithmonë energji të reja dhe dëshirë për të luajtur në klubin ku janë rritur.
Mbi të ardhmen e lojtarëve si Savinho, Aké dhe Akanji, të cilët flitet se janë në largim, tekniku sqaroi se “janë lojtarët tanë dhe do të shohim çfarë do të ndodhëë këto ditë…”.
Për kundërshtarët dhe trajnerin e ri të “Spurs”, Thomas Frank, trajneri i Cityt nuk kurseu fjalët e mira.
“Është herët për t’i kuptuar ndryshimet, por nuk kam dyshime që Thomasi do të bëjë një punë të jashtëzakonshme në një klub kaq të madh, siç bëri te Brentford. Ai sjell alternativa të tjera në lojë. Të hysh në një klub të ri gjithmonë është sfidë argëtuese, por na duhet të presim. Ndërkaq ne e vlerësojmë Totenhemin maksimalisht, mirëpo na duhet të bëjmë detyrën, për të marrë fitoren e radhës në kampionat”, përfundoi Guardiola.
