Ish-komandanti në Betejën e Koshares, Dema Maloku, ka kujtuar një nga periudhat më të vështira të luftës, duke theksuar sfidat e mëdha me të cilat u përballën luftëtarët dhe populli i Kosovës gjatë vitit 1998 dhe 1999.
Sipas tij, beteja e Koshares ishte e planifikuar, por zhvillimi i saj u shoqërua me vështirësi të mëdha, përfshirë sakrificat e popullsisë dhe mobilizimin e luftëtarëve në kushte të rënda.
Ai theksoi se fillimisht numri i ushtarëve ishte i vogël, ndërsa situata ndryshoi pas 9 prillit, kur ndodhi një mobilizim i gjerë në të gjithë territorin e Kosovës.
Maloku veçoi datat 10 deri më 19 prill si periudhën me luftimet më të ashpra, duke shtuar se më pas fronti filloi të stabilizohej gradualisht.
Maloku gjithashtu përmendi rëndësinë e ardhjes së luftëtarëve nga diaspora, të cilët kontribuuan në forcimin e radhëve në këtë betejë.
“Beteja e Koshares ka ardhur si diçka e planifikuar, viti 98 ka qenë vit shumë sfidues, i mundimshëm, populli jonë ka kaluar në sakrificë të paparë qoftë deri në përmasa gjenocidale, dhe kjo normal që transferohet edhe te ushtarët dhe të tjerët, ajo pjesë ka qenë mjaft sfiduese, ka qenë shumë sfiduese edhe mobilizimi i bashkëluftarëve i ushtarëve në atë kohë me i bind dhe me u rikthye dhe me luftua prapë armikun sepse misioni nuk ishte kompletuar, derisa të largohet ushtari i fundit i Serbisë nga Kosova. Deri më 9 prill ka qenë një numër shumë i vogël i ushtarëve, mandej mas 9 prilli atëherë mobilizimi i përgjithshëm që ka ndodh në gjithë territorin e Kosovës e ka bërë gjithë punën e vet. Datat 10 prill, 11 deri më datën 19 prill kanë qenë ditë më sfiduese luftimet më të ashpra, mandej ka shkuar duke u stabilizuar fronti në një masë të caktuar, njëjtën kohë edhe ardhja dhe prurja e ushtarëve nga diaspora, Kosova”, ka deklaruar Maloku në emisionin “Ditari” në Tëvë1./teve1.info/
