Trajneri Javier Aguirre e ka theksuar edhe një herë se sa i mungon Mallorcas prania në fushë e sulmuesit të Kosovës, Vedat Muriqi. Ai ka thënë se Muriqi është duke e marrë veten nga lëndimi, por ka shtuar se ende nuk është i gatshëm për lojë.
Muriqi u lëndua muajin kaluar gjatë grumbullimit me Kosovën.
“Vedati ka nevojë për mbështetjen tonë morale. Ai po e kalon mirë lëndimin, po bën mirë, ka dëshirë të jetë në fushë, sepse e sheh që skuadra ka nevojë për të dhe të shohësh ndeshjen nga jashtë është e dhimbshme. Vedati në këto dy edicione ka treguar se ka qenë me ne dhe ka shënuar 15 gola, ndonëse ka ardhur në dhjetor. Këtë kampionat ka katër gola. Mund të kishte gjashtë, por ka humbur dy penallti. Na mungon, sepse është golashënuesi më i mirë, mund ta dalloni mungesën e tij. Ai është një lojtar që kundërshtari thotë ‘Ui Muriqi’”, ka thënë Aguirre në konferencën për media.
Mallorca është në vendin e 17-të me 11 pikë. Synim ka mbijetesën në La Liga.
