Makshana theksoi se mosparaqitja e kryeprokurorit në konferencën e mbajtur nga Prokuroria Themelore në Prishtinë, është fyerje ndaj të gjithë viktimave dhe protestuesve.
“Në konferëncën e mbajtur dje nga Prokuroria Themelore në Prishtinë ne të gjithë prisnim që para mediave të deklarohej edhe kryeprokurori i Prokurorisë Themelore në Prishtinë, Kujtim Munishi por megjithatë ai nuk ishte paraqitur dhe kjo për mendimin tonë është fyerje dhe ofendim ndaj të gjithë viktimave dhe protestuesve lidhur me këto raste dhe me rastet tjera të cilat i ka trajtuar kjo Prokurori sepse, kjo i mbulon vetëm rastet në Prishtinë dhe rrethinë. Prandaj ishte e pa arsyeshme se si ai nuk pati guxim të përballej me mediat dhe të jepë të paktën një llogari se si e ka trajtuar rastin në fjalë dhe rastet e tjera”, tha ai.
Teksa shtoi se kryeprokurori Munishi duhet të japë dorëheqje për shkak se sipas tij, ai ka dështuar në marrjen e përgjegjësive për rastin e dhunimit të 11- vjeçares.
“Ne mendojmë që kërkesat për shkarkimin apo dorëheqjen e kryeprokurorit Munishi janë legjitime për shkak se kryeprokurori jo vetëm në këtë rast që ka dështuar kjo Prokurori në trajtimin e këtij rasti, ne psh vitin e kaluar e kemi edhe rastin e të ndjeres Sebahate Morina, ku edhe ai ishte bërë një lajm i njohur mediatik për shkak të raportimeve të disa hershme në Polici e Prokurori dhe Prokuroria nuk kishte ndërmarrë veprime të nevojshme ku si pasojë ajo u vra. Pra ne edhe atëherë kemi kërkuar dorëheqjen e tij dhe në këtë rast më e pakta që mund të bëhet nga kryeprokurori Munishi është që ai te japë dorëheqje për shkak që nuk ka arritur të marrë përgjegjësit e nevojshme për rastet “, tha ai.
Makshana komentoi edhe ndërhyrjet që po bëhen nga ekzekutivi, KGJK-ja dhe KPK-ja lidhur me rastin e që siç tha ai, nuk do të duhej të ndodhnin sepse sipas tij, gjyqësori duhet të jetë i pavarur në çdo rast
“Ndërhyrjet që po bëhen nuk do të duhet të bëheshin sepse pushtetet janë të ndara në Republikën e Kosovës. Secili institucion ka pavarësinë e vet të cilat nuk do të duhej të cenoheshin nga askush e as nga ekzekutivi . Në rastin konkret i kemi parë akuzat që po bëhen nga ekzekutivi dhe KGJK-ja e KPK-ja. Ne mendojmë që secili pushtet duhet ti kryejë punët e veta dhe ndikimi nuk duhet të ndodhë për shkak se sistemi gjyqësor është i paanshëm dhe duhet të jetë i pavarur në çdo rast”, tha ai.
Kurse gjatë ditës se djeshme përderisa Kryesuesi i Këshillit Gjyqësor të Kosovës, Albert Zogaj ka thënë se rasti i 11-vjeçarës nuk ka qenë asnjëherë në gjykatë, përfaqësues të organizatave joqeveritare kanë ndërprerë konferencën me filikaqa./teve1.info/
