I pyetur nëse ai, ashtu si presidenti amerikan Joe Biden, do të përdorte termin “gjenocid” për vrasjen e ukrainasve nga ushtria ruse, Macron ka thënë se ai është më i kujdesshëm me terma të tillë
“Unë do të isha i kujdesshëm me terma të tillë sot sepse këta dy popuj rusët dhe ukrainasit janë vëllezër”, ka thënë ai.
“Dua të vazhdoj të përpiqem, sa më shumë që të mundem, për të ndalur këtë luftë dhe për të rindërtuar paqen. Nuk jam i sigurt se përshkallëzimi i retorikës i shërben kësaj kauze,” shtoi ai.
“Ajo që mund të themi me siguri është se situata është e papranueshme dhe se këto janë krime lufte. Ne po jetojmë përmes krimeve të luftës që janë të paprecedentë në tokën tonë – tokën tonë evropiane”, ka deklaruar presidenti francez, shkruan CNN, transmeton teve1.info
Macron, i cili aktualisht kandidon për rizgjedhje, vuri në dukje gjithashtu bashkëpunimin e Francës me Ukrainën për të hetuar krimet e supozuara të luftës.
“Rusia ka filluar në mënyrë të njëanshme një luftë jashtëzakonisht brutale, tani është vërtetuar se ushtria ruse ka kryer krime lufte dhe tani duhet të gjejmë ata që janë përgjegjës”, tha Macron.
Kujtojmë që Biden tha të martën se mizoritë që po zbulohen në Ukrainë kualifikohen si gjenocid, duke thënë se “po bëhet gjithnjë e më e qartë se (presidenti rus Vladimir) Putin thjesht po përpiqet të fshijë edhe idenë e të qenit ukrainas”.
Edhe liderët të tjerë botërorë, si Boris Johnson i Britanisë së Madhe dhe Andrzej Duda i Polonisë, kanë përdorur gjithashtu fjalën “gjenocid” për të përshkruar veprimet ruse në Ukrainë.
