Bashkë me familjarë të tjerë, erdhi te varrezat e martirëve të familjes Muliqi.
Për të dhimbja vazhdon të jetë e njëjtë.
Remzije Muliqit, në këtë masakër iu vra burri dhe dy djemtë, njëri 15 vjeç e tjetri 13.
“Rasti ma i rëndë sdi qysh e kemi kalu, njëherë rëndë që e ditëm që si kemi, tani kur jemi shku i kemi pa shenjat e tyre në Skenderaj, ma rëndë më nuk di çka, rëndë ish mi gjet copat e teshave të djemve të rinj dhe i kemi varros”.
Në Arbëri të Epërme të Drenasit i pranishëm ishte edhe kryeministri Albin Kurti.
“Sot me 30 mars jemi për masakrën e dytë në fshatin e njëjtë. Masakra ndaj familjes Muliqi e cila i ka 8 martirë dhe një dëshmorë dhe 9 luftëtarë të UCK-së. Prej këtyre 8 martirëve, 4 martirë ishin nxënës, pra ishin të mitur, Ganiu, Musa, Behrami edhe Sefa. Sejfullahu është dëshmorë i kësaj familje i rënë në betejën më 19 gusht 1998 pa i bërë 17 vjet”.
E nga aty, kreu i Ekzekutivit tha se po bëhen përgatitjet që të akuzohet Serbia si shtet përgjegjës për krimet e kryera gjatë luftës në Kosovë.
“Edhe Ministria e Drejtësisë edhe këshilltarët e mi ligjorë janë duke i bërë edhe me ekspertë ndërkombëtarë të gjitha përgatitjet që të akuzohet Serbia si shtet përgjegjës për krimet e kryera gjatë luftës në Kosovë e që janë krime lufte, krime kundër njerëzimit dhe gjenocidit”, tha ai.
Në të njëjtën kohë, ai i bëri thirrje Prokurorisë së Shtetit që të angazhohen maksimalisht ditë e natë, në mënyrë që vrasësit të dënohen.
