Në seancën e jashtëzakonshme të Kuvendit të Kosovës, Lëvizja Vetëvendosje ka prezantuar zyrtarisht dy kandidaturat për postin e Presidentit të Republikës.
Shefja e Grupit Parlamentar të LVV-së, Arbërie Nagavci, para deputetëve ka paraqitur biografinë e kandidates Feride Rushiti, drejtoreshë e Qendrës Kosovare për Rehabilitimin e të Mbijetuarve të Torturës (QKRMT).
Nagavci ka vlerësuar punën e Rushitit në mbrojtjen dhe rehabilitimin e viktimave të dhunës, duke theksuar se ajo ka luajtur rol në “thyerjen e heshtjes, luftimin e stigmës dhe ndryshimin e perceptimit shoqëror ndaj viktimave të dhunës seksuale”.
Ajo ka kujtuar gjithashtu se në vitin 2018 Rushiti është nderuar me Çmimin për Guximin e Gruas nga Departamenti i Shtetit i SHBA-së, ndërsa në vitin 2025 është nominuar për Çmimin Nobel për Paqe.
Ndërkohë, kandidatura e dytë, Hatixhe Hoxha, është propozuar nga deputeti i LVV-së Luan Aliu.
Aliu ka theksuar se Hoxha ka dhënë kontribut në përkrahjen e personave me aftësi të kufizuara dhe në proceset e ndërtimit të institucioneve të shtetit.
Sipas tij, përvoja e saj politike dhe akademike e bën atë kandidate të denjë për këtë post.
“Lidershipi i saj do të kontribuojë në përfaqësimin dinjitoz të Kosovës brenda dhe jashtë vendit”, ka deklaruar Aliu gjatë prezantimit.
