Më shumë kohë u mori mbledhja në ambiente të ndërtesës së Kuvendit, se sa qëndrimi në sallë të seancës plenare.
Dështimi i seancës plenare nga Lëvizja Vetëvendosje, iu atribua sërish partive opozitare.
Sipas Vetëvendosjes, opozita duhet të tregojë se çfarë po synon me mosvotim.
“Është i pakuptueshëm ky hezitim i opozitës për të votuar me votë të fshehtë, i cili e shpërfaqë mosbesimin që drejtuesit e partive opozitare e kanë ndaj deputetëve të tyre. Kjo mungesë e besimit ndaj deputetëve të tyre, tregon që vullneti për të bllokuar proceset”, u shpreh Donika Gërvalla, ministre në detyrë e Punëve të Jashtme dhe Disaporës.
Kurse, PDK e ritheksoi se nuk kanë votë për Albulena Haxhiu si kryekuvendare.
“Për të dhjetën herë me radhë po tentojnë që në forma të paligjshme, jokushtetuese, fatkeqësisht duke keqpërdorur mënyrën më eklatante një njeri të moshuar që është deputet i Kosovës, zoti Dehari, edhe sot tentuan për herë të dhjetë, të imponojnë vullnetin e tyre duke shkelur Kushtetutën hapur. Por, ne ua bëjmë të qartë edhe njëherë. Qytetarët nuk na kanë votuar neve as për ta shkelë ligjin, e as për ta shkelë Kushtetutën. Na ka votuar për me i dhanë vendit institucione. Dhe ua përkujtoj e ua përsëris. As herën e parë, as herën e dhjetë, e as herën e njëqindtë, nuk kalon Albulena Haxhiu”, tha kryetari i PDK-së, Memli Krasniqi.
Nga LDK-ja u shprehën se qëndrimi i tyre nuk do të ndryshojë, derisa Vetëvendosje të reflektojë.
Hykmete Bajrami nga kjo parti, shprehu keqardhje pasi sipas saj, Avni Dehari po përdoret nga partia e tij.
“Na vjen jashtëzakonisht keq, sidomos për zotin Dehari, i cili si kryesues i seancës nuk përfaqëson Lëvizjen Vetëvendosje. Nuk është aty për shkak se partia e tij është fituese e zgjedhjeve të 9 shkurtit, por është aty për shkak të moshës dhe asgjë tjetër. Dhe ai duhet të përcjellë skenarin e përgatitur nga sekretaria e Kuvendit, dhe jo skenarin në të cilin atë e fut Lëvizja Vetëvendosje. Ne nuk kemi votë për Albulena Haxhiu, e kemi deklaruar që nga fillimi vota jonë është kundër. Kryetari i Parlamentit duhet të zgjedhet me marrëveshje politike, dhe kështu do të vazhdojmë përderisa ata nuk reflektojnë”, tha Hykmete Bajramai deputete e LDK-së.
“Kam dëgju disa mundësi, ndoshta nuk ka ardhë dita ende, por kam dëgju si mundësi që të ketë përpjekje për një kandidaturë unifikuese. …..Nuk kam emra por kam dëgjuar që ka përpjekje m’u gjetë një formulë për me shku me një kandidaturë unifikuese… Shpresoj ta kuptojnë që është në interes të tyre dhe të vendit mos me mbajtë pezull parlamentin e Kosovës”, tha kryetari i kësaj partie, Ramush Haradinaj.
Të zgjedhurit e popullit, do të mblidhen sërish të hënën.
