Instituti i Kosovës për Drejtësi (IKD) ka publikuar një raport lidhur me pastërtinë e listave të partive politike, ku ka theksuar se numrin më të madh të kandidatëve për deputetë që kanë probleme me ligjin e mban Lëvizja Vetëvendosje.
Hulumtuesi i lartë në IKD, Gëzim Shala gjatë publikimit të raportit “Integriteti i listave zgjedhore – Zgjedhjet e parakohshme parlamentare 7 qershor 2026” ka thënë se Lëvizja Vetëvendosje prin me numrin më të madh të kandidatëve që kanë probleme me ligjin në zgjedhjet e parakohshme parlamentare të 7 qershorit.
“Nga këta 902 kandidat rezulton se 25 prej tyre janë të përfshirë në raste penale. Shprehur në përqindje i bije që 2.77 përqind në totalin e listës së kandidatëve janë persona që kanë dënime të formës së prerë ose aktakuza aktive. 15 prej tyre janë me aktakuza aktive, ndërkaq, 13 të tjerë janë persona që në të kaluarën kanë pas dënime penale. Janë evidentuar edhe tre kandidatë që përveç aktakuzës aktive kanë edhe dënime penale. Sa i përket subjekteve politike numrin më të madh të kandidatëve të cilët kanë probleme me ligjin e mban Lëvizja Vetëvendosje me gjithsej 13 kandidatë që në raport me listën e përgjithshme prej 902 kandidatëve, pjesëmarrja e këtij subjekti është 1.44 përqind. AAK dhe Lista Serbe kanë nga tre kandidatë që kanë probleme me ligjin, KDTP ja me dy kandidatë, ndërsa katër subjektet tjera të tjera kanë nga një kandidatë që kanë probleme me ligjin. Sa i përket kapitujve të veprave penale të cilët ose janë dënuar ose akuzohen kandidatët në fjalë dominojnë veprat e korrupsionit”, ka deklaruar ai.
Ndërkohë, hulumtuesja nga Instituti i Kosovës për Drejtësi, Shqiponjë Gashi në hapjen e kësaj konference mes tjerash ka theksuar se IKD në vazhdimësi ka avokuar për dekriminalizimin e politikës dhe forcimin e integritetit të personave që synojnë të ushtrojnë funksione publike.
“IKD vlerëson se persona që janë përfshirë në raste penale edhe në raste ku nuk ekzistojnë kufizime ligjore, me qëllim të formimit të integritetit dhe ruajtjes së parimeve të qeverisjes së mirë, nuk duhet të jenë pjesë të listave zgjedhore dhe as bartës të listave zgjedhore dhe as bartës të ”, ka thënë Gashi.
Ata u kanë bërë thirrje qytetarëve që mos të votojnë personat që kanë vepra penale.
