Lëvizja Vetëvendosje dhe Lidhja Demokratike e Kosovës kanë shprehur gatishmëri për një bashkëpunim për çështjen e presidentit.
Kjo u ritheksua edhe pas Kuvendit të jashtëzakonshëm të LDK-së të enjten në cilin kryetari i kësaj partie, Lumir Abdixhiku me shumicë votash të delegatëve u konfirmua në krye të partisë.
Pas këtij Kuvendi, u miratua dhe një deklaratë në cilën shprehet gatishmëria e LDK-së për formimin e institucioneve.
Edhe Abdixhiku tha se do të bëjnë çmos që të shmangen zgjedhjet.
“Është e rëndësishme t’i shmangim zgjedhjet, jam i interesuar të gjejmë zgjidhje të diskutojmë”, tha ai.
Në Lëvizjen Vetëvendosje poashtu kanë shprehur gatishmëri për arritjen e një marrëveshje me LDK – në për çështjen e presidentit.
“Ne natyrisht e mirëpresim këtë vendim të Kuvendit të LDK-së dhe presim që të vazhdojnë diskutimet dhe dakordimi, sepse vendi ka nevojë që sa më parë të vazhdojë puna”, tha Arbërie Nagavci shefe e Grupit Parlamentar të LVV-së në legjislaturën e kaluar.
A do të jetë Vjosa Osmani ‘pengesa” për një marrëveshje
Lidhja Demokratike e Kosovës synon që ta marrë postin e presidentit.
Në zgjedhjet e 7 qershorit kjo parti kishte kandidate për presidente, Vjosa Osmanin e cila nuk është e pranueshme nga LVV-së.
Disa deputetë të kësaj partie pas zgjedhjeve të 7 qershorit janë deklaruar se nuk kanë votë për Osmanin.
Ndonëse LVV nuk ka ndonjë qëndrim zyrtar sa i përket mundësisë që Osmani të jetë emri për presidente i propozuar nga LDK, qëndrimet e deritanishme lënë pak shpresë që ish-presidentja të jetë e pranueshme nga partia fituese e zgjedhjeve.
Edhe në LDK, por edhe vet Osmani është shprehur se emri i saj, “nuk do të jetë pengesë për formimin e institucioneve”.
Më 6 gusht do të mbahet seanca konstituive e Kuvendit të Kosovës për legjislaturën e 11-të. Nga rezultati i zgjedhjeve të 7 qershorit, LVV dhe parterët bashkë me komunitetet pakicë, jo serbe kanë votat e mjaftushem për të zgjedhur kryetarin e Kuvendit./teve1.info/
