Sami Lushtaku ka bërë të ditur se përmes avokatit të tij ka dorëzuar padi për shpifje ndaj kryeministrit Albin Kurti, pas deklaratave që, sipas tij, janë të pavërteta dhe tendencioze.
Përmes një postimi në Facebook, Lushtaku tha se nuk do të lejojë që emri dhe dinjiteti i tij të përdoren për propagandë politike dhe shpifje.
“Sot përmes avokatit tim kam dorëzuar padi për shpifje ndaj Albin Kurtit, pas deklaratave të pavërteta dhe tendencioze ndaj meje. Nuk do të lejoj që emri im, kontributi im dhe dinjiteti im të përdoren për propagandë politike, mashtrime publike e shpifje të ulëta. Kjo është një përgjigje e qartë për çdo tentativë linçimi politik. Çdokush që shpif e manipulon me të pavërteta, do të përballet me të njëjtin veprim dhe me përgjegjësi para ligjit!”, ka shkruar Lushtaku.
Ai i referohet deklaratave të bëra nga Kurti gjatë një emisioni televiziv të transmetuar këtyre ditëve në një nga mediet vendore.
