Kryetari i Lidhjes Demokratike të Kosovës (LDK), Lumir Abdixhiku, ka reaguar pas pezullimit nga Shtetet e Bashkuara të Amerikës të dialogut strategjik me Kosovën.
Ai e ka cilësuar këtë zhvillim si momentin më të rëndë në marrëdhëniet mes Kosovës dhe aleatit të saj kryesor.
“Suspendimi i dialogut strategjik me SHBA-të paraqet pikën më të ulët të relacioneve të Kosovës me aleatin tonë strategjik dhe ekzistencial; si shtet i pavarur e sovran,” ka shkruar Abdixhiku në Facebook.
Në reagimin e tij, kreu i LDK-së akuzoi qeverinë aktuale për, siç tha, shkatërrim të shtetit dhe bllokim të së ardhmes.
“Shkatërruesit e shtetit, bllokuesit historik, shkelësit e Kushtetutës, ligjeve e normave morale njerëzore, kanë zgjedhur të ndërtojnë rrugëtimin e tyre mbi krizën e përhershme, mbi frikën e pashtershme dhe mbi fatkeqësinë e Republikës,” ka shkruar ai.
Abdixhiku u bëri thirrje qytetarëve për unitet politik e shoqëror.
“Populli i Kosovës nuk është si ta. Populli i Kosovës nuk do të jetë si ta. Është koha të bashkohemi të gjithë; t’i japim fund kësaj çmendurie politike dhe të ndërtojmë shtetin që e kemi merituar gjithmonë – para se të bëhet vonë për të gjithë,” ka theksuar ai.
Ai po ashtu premtoi se LDK do të mbetet e përkushtuar në ruajtjen e kursit euroatlantik të vendit.
“LDK do të kujdestarojë me plot përkushtim e përgjegjësi rrugën euroatlantike të Kosovës; do të garantojë miqësinë e përhershme me SHBA-në dhe do të rikthejë vendin tonë në binarët e arsyes, ligjit dhe demokracisë. Le t’i japim dritë Republikës sonë të përhershme!” ka përfunduar Abdixhiku.
