Loret Sadiku është shumë pranë një rikthimi te Helsingborgs IF, klubi ku ai ka lënë gjurmë gjatë periudhës 2012–2014. Lajmi raportohet nga prestigjiozja suedeze “Helsingborgs Dagblad”.
Më herët gjatë ditës së hënë, Helsingborgs IF njoftoi shitjen e mesfushorit 21-vjeçar Benjamin Örn te klubi danez Randers. Megjithatë, drejtuesit e klubit duket se po veprojnë shpejt për të mbushur boshllëkun e krijuar, duke synuar rikthimin e një emri të njohur për tifozët.
Sipas raportimeve, mesfushori defensiv 34-vjeçar Sadiku ka stërvitur me ekipin gjatë gjithë fazës përgatitore dhe tashmë është shumë pranë firmosjes së kontratës me klubin që aktualisht garon në Superettan, kategorinë e dytë të futbollit suedez. Burimet bëjnë me dije se marrëveshja mund të zyrtarizohet në ditët në vijim.
Përveç Helsingborgs IF, Loret Sadiku ka një karrierë të pasur ndërkombëtare, duke luajtur për skuadra si IFK Värnamo dhe Hammarby IF në Suedi, si dhe për klube turke si Mersin, Kasimpasa dhe Adanaspor.
Nëse transferimi konkretizohet, rikthimi i Sadikut pritet t’i japë përvojë dhe stabilitet mesfushës së Helsingborgut në objektivin për t’u rikthyer në elitën e futbollit suedez.
