BE ka paralajmëruar Serbinë se mund të ketë sanksione ndaj saj, për shkak të qasjes qe ajo ka ndaj Rusisë. Por, pavarësisht kësaj, njohësit e çështjeve politike thonë se Serbia nuk do ta ndal lobin kundër Kosovës, megjithëse ky lob, sipas tyre, nuk mund të jetë vendimtar për anëtarësimin e vendit në mekanizma ndërkombëtar.
Republika e Kosovës po pret që brenda muajit tetor të marr një lajm pozitiv për liberalizimin e vizave.
Në anën tjetër, vendi është edhe në proces për anëtarësimin në Këshillin e Evropës, synim ky për të cilin Serbia ka deklaruar hapur se do të lobojë që ta pamundësoi anëtarësimin e Kosovës në këtë organizatë.
Ish-ambasadori i Shqipërisë në OKB, Agim Nesho, thotë se pavarësisht paralajmërimeve të BE-së për sanksione ndaj Serbisë, ky vend nuk do ta ndal lobin ndaj Republikës së Kosovës.
“Unë mendoj që lobi serb, është një lob që nuk do të tërhiqet nga pretendimet e tij sidomos ndaj Republikës së Kosovës, është një lob agresiv është një lob i ushqyer nga nacionalizimi i ri serb i Vuciq, Daqiq, Vulin e të tjerë dhe si të tillë ata do të vazhdojnë këtë politikë, nuk do të ketë tërheqje … unë mendoj që rruga e Serbisë nuk është rruga evropiane. Ata shumë shpejtë ndaj këtij presioni të Perëndimit do të zgjedhin një rrugë. Në pamundësi për të dal direkt pro Rusisë, për arsye se Rusia tash më është e dërmuar nga lufta në Ukrainë, ata do të zgjedhin një pozicion të vendit të paangazhuar”, tha ai.
E njohësi i çështjeve politike, Ardian Arifaj, thotë se Kosova duhet të punoi më shumë me shtetet e mëdha, pasi sipas tij, Serbia nuk mund të bllokoi anëtarësimin e Kosovës në mekanizma ndërkombëtar.
“Nuk është Serbia çelësi, ose nuk është vendi kryesor që e pengon Kosovën prej anëtarësimit në këto organizata, sidomos kur jemi duke folur për Këshillin e Evropës. Për Kosovën kryesore është që të bashkëpunoi sa ma afër, sa ma ngushtë me shtetet që e përkrahin Kosovën, që e kanë përkrah vazhdimisht Kosovën edhe me përkrahjen e tyre me votën e tyre të anëtarësohet në këto organizata. Serbia nuk mundet me qenë pengesë, pengesë munden me qenë shtetet e mëdha të cilat nuk kanë qenë të gatshme me e përkrah Kosovën në një moment të caktuar historik, por tani dyert janë hapur, Kosova i ka plotësuar krejt kushtet, Kosova nuk duhet të merret me Serbinë po duhet të merret me aleatet, partneret e saj”, ka deklaruar Arifaj.
Lobimi kryesor i Serbisë është i fokusuar në sigurimin e ç’njohjeve për Republikën e Kosovës.
Raport i gazetarit Valmir Gallopeni
