Llapi është finalistja e parë e Kupës së Kosovës në futboll.
Të mërkurën, në stadiumin “Bajram Aliu” në Skenderaj, Llapi e mposhti Drenicën në ndeshjen e dytë me rezultatin 2:0.
Rezultati i përgjithshëm i dy ndeshjeve mes Llapit dhe Drenicës është 4:0.
Golat për skuadrën e trajnerit Tahir Batatina i shënoi Arianit Hasani, fillimisht në minutën e 66-të, pas asistimit nga Elvir Gashjani dhe më pas në minutën e 77-të, kur u asistua nga Ardit Tahiri.
Llapi e sheh kualifikimin në Evropë si më të arritshëm përmes Kupës, ku është vetëm një fitore larg. Ndërkohë, në kampionat, zë vendin e gjashtë në tabelë.
Finalisti i dytë do të mësohet sonte, kur në stadiumin “Fadil Vokrri”, nga ora 20:00, do të përballen Prishtina dhe Drita.
Rezultati i ndeshjes së parë mes “Plisave” dhe “Intelektualëve” përfundoi 1:0 në favor të kryeqytetasve. Gjysmëfinalen mes Prishtinës dhe Dritës, mund ta ndiqni drejtpërdrejt në platformën “Telkos”.
