Gara për titullin e kampionit në Superligën e Kosovës në futboll mund të marrë fund këtë të shtunë ose të shtyhet për xhiron e fundit që luhet vikendin e ardhshëm.
Të gjitha ndeshjet e xhiros së 35-të që është e parafundit, do të luhen të shtunën prej orës 15:00 por vëmendja do të jetë në Podujevë, ku Llapi e pret skuadrën e Ballkanit.
Këto dy skuadra janë në garë për titullin e kampionit, por Ballkani ka një përparësi ndaj Llapit.
Prinë në tabelë me katër pikë më shumë se Llapi dhe barazimi në derbin që do të luhet në stadiumin “Zahir Pajaziti” i mjafton Ballkanit për ta mbrojtur titullin e kampionit.
Në rast se Llapi e mposht Ballkanin, atëherë titulli do të vendoset në xhiron e fundit pasi ekipi i trajnerit Tahir Batatina do të ketë vetëm një pikë më pak se ai i Ilir Dajës.
Ballkani ka 72 pikë dhe po synon titullin e tretë rresht, ndërsa Llapi me 68 pikë po e kërkon këtë sukses për herë të parë në histori të klubit.
Në tri përballjet e këtij dy edicioni, skuadrat kanë bilanc të barabartë.
Ballkani e fitoi 2:1 duelin e parë në shtëpi, përpara se të mposhtet në udhëtim te Llapi 5:3 në përballjen e dytë, ndërsa ndeshja e tretë në Suharekë u mbyll pa gola.
Të gjitha ndeshjet tjera, do të luhen nën hijen e këtij derbi, ndonëse interesante në këtë xhiro do të jetë edhe gara për t’i ikur barazhit.
Aktualisht, pozitën e tetë në tabelë që dërgon në barazh, e mbanë Feronikeli ’74 me 38 pikë, një më pak se skuadra e Gjilanit që zë vendin e shtatë.
Të dyja skuadrat në këtë xhiro luajnë në shtëpi, me Feronikelin ’74 që e pret në Drenas skuadrën e Dukagjinit kurse Gjilani përballet me rivalin e përbetuar të qytetit, Dritën.
Skuadra e Malishevës pritet të kthehet tek fitorja pasi në pesë ndeshjet e fundit ka marrë vetëm një pikë.
Malisheva që është e katërta në tabelë me 53 pikë, 13 më pak se Drita që është e treta, luan në shtëpi kundër Lirisë që edicionin tjetër do të garojë në Ligën e Parë.
E punë me një ekip që edicionin e ardhshëm do të paraqitet në një kategori më poshtë, Fushë Kosovën do të ketë skuadra e Prishtinës.
Si Malisheva ashtu edhe Prishtina llogariten favorite në këto përballje, ndonëse këtë edicion do ta mbyllin në pozitat aktuale, katër dhe pesë.
