Liverpool pa mund të madh me “tris” ka marrë pikët e plota në “Anfield”. Të kuqtë mposhtën me shifra Aston Villën, derisa tani janë në kuotën e dhjetë pikëve në vendin e tretë, derisa Villa e 11 me 6 pikë.
Liverpool e nis në mënyrën më të mirë të mundshme ndeshjen, derisa kaluan në avantazh që në minutën e tretë me anë të Dominik Szoboszlai. Mesfushori realizoi një gol shumë të bukur në hyrje të zonës teksa nuk i la asnjë shans portierit kundërshtar Martinez.
Ndërsa “The Reds” gjetën rrjetën edhe njëherë tjetër. Në fakt, ishte autogol pasi goditja e Darwin Nunez u përplas në shtyllë dhe u devijua gabimisht në rrjetë nga Matty Cash, duke bërë që pjesa e parë të mbyllej me rezultatin 2:0.
Të besuarit e trajnerit Jurgen Klopp shënuan sërish dhe vendosën në kasafortë trepikëshin, me Mohamed Salah që shënoi golin e tretë.
Fitore me peshë të madhe mori edhe Crystal Palace, e cila mposhti 3:1 Wolvesin në “Selhurst Park”. Me këtë trepikësh, Crystali ka shtatë pikë në vendin e shtatë, derisa Wolvesi ndodhet e 15 me tre pikë.
