Qendra e Golden Eagle Yllit, Lis Shoshi e ka fituar epitetin e basketbollistit më të mirë për xhiron e fundit të stinorit të rregullt në Superligën e Kosovës në basketboll. Federata e Basketbollit të Kosovës (FBK), të hënën ka njoftuar se Shoshi është shpallur “MVP i Javës” për xhiron e 28-të, në të cilën Ylli triumfoi ndaj Proton Cable Prizrenit.
Në këtë triumf të ekipit nga Suhareka, Shoshi kontribuoi me 25 pikë, 15 kërcime e 4 asistime duke e pasur indeksin 40, me të lartin nga të gjithë basketbollistët.
Po ashtu, Shoshi është përfshirë edhe në “Top 5” të javës dhe është basketbollisti i vetëm i Yllit në ekipin më të mirë. Në pesëshen më të mirë janë edhe dyshja e Bashkimit, Lejson Zeqiri e Dirk Williams pastaj Tekele Cotton i Trepçës dhe Rashid Mahalbashiq i Sigal Prishtinës.
Zeqiri pati 22 pikë, 6 kërcime e 4 asistime në fitoren e Bashkimit ndaj Pejës kurse Williams shtoi 10 pikë, 13 kërcime e 6 asistime. Amerikani Cotton me 13 pikë, 5 kërcime e 11 asistime udhëhoqi Trepçën në triumfin ndaj Borës, ndërsa Mahallbashiq realizoi 10 pikë, 12 kërcime e 2 asistime në fitoren e Prishtinës kundër Vëllaznimit.
