Ish-polici Arbnor Spahiu është liruar nga burgu në Serbi të premten, kanë bërë të ditur familjarët e tij.
Pas lirimit, ka reaguar Ministria e Punëve të Jashtme dhe Diasporës së Kosovës.
“Ministria e Punëve të Jashtme dhe Diasporës është informuar nga Zyra Ndërlidhëse e Kosovës në Serbi lidhur me lirimin nga paraburgimi të shtetasit të Republikës së Kosovës, Arbnor Spahiu, i cili nga autoritetet gjyqësore të Serbisë ishte mbajtur në paraburgim për një periudhë të zgjatur, nën akuza të pabazuara për ‘vrasje të rëndë’ të lidhura me ngjarjet në Banjskë, në vitin 2023.
Që nga dita e parë e arrestimit të tij, Ministria e Punëve të Jashtme dhe Diasporës, përkatësisht Zyra Ndërlidhëse e Republikës së Kosovës së bashku me institucionet tjera gjegjëse, kanë ndjekur nga afër rastin dhe kanë ofruar mbështetjen e nevojshme, duke insistuar vazhdimisht që ndaj tij të respektohen të drejtat themelore të njeriut dhe standardet ndërkombëtare të drejtësisë”, thuhet në reagim.
MPJD thekson se akuzat e autoriteteve serbe ndaj Spahiut kanë qenë të motivuara politikisht dhe të pabazuara në prova, ndërsa paraburgimi i tij i gjatë ka shkelur të drejtën për një proces të rregullt dhe trajtim të drejtë.
“Lirimi i Spahiut konfirmon qartazi se pretendimet e Serbisë lidhur me rastin në fjalë nuk kanë qëndruar dhe se përdorimi i sistemit të drejtësisë për presion politik ndaj qytetarëve tanë është praktikë që duhet të marrë fund”, thekson më tej MPJD.
Ministria falënderon institucionet vendore dhe ndërkombëtare që kanë kontribuar në trajtimin e drejtë të këtij rasti dhe thekson përkushtimin e saj për të mbrojtur çdo qytetar të Republikës së Kosovës kudo që ndodhet.
Ndryshe, Spahiu ishte mbajtur në Suboticë, në veri të Serbisë, që nga 9 qershori, kur gjykata në këtë qytet urdhëroi paraburgimin e tij për kryerjen e veprës penale “vrasje e rëndë” në fshatin Banjskë, në veri të Kosovës./teve1.info/
