Tre profesorë ulur karshi njëri-tjetrit dolën në një konferencë për media në kuadër të platformës “Liria ka Emër”.
Profesorët e njohur universitar thanë që me shumë shqetësim po i ndjekin zhvillimet në Hagë ku po gjykohen ish-krerët e Ushtrisë Çlirimtare të Kosovës.
Profesori i të drejtës kushtetuese, Arsim Bajrami, prezantoi një studim ku mes tjerash tregoi se sipas tij, ka disa shkelje nga Gjykata Speciale.
Bajrami tha se përmes Gjykatës Speciale po synohet të shtrembërohet e vërteta dhe të lihet anash gjenocidi i kryer në Kosovë.
“Gjykata Speciale është një tendencë e hapur, që përmes këtij procesi, krejtësisht të montuar të shtrembërojë të vërtetën për historinë moderne të Kosovës, në radhë të parë dhe ekskluzivisht për të keqinterpretuar luftën e drejtë çlirimtare, të popullit të Kosovës, luftën për vetëmbrojtje, çlirimin nga sundimi serb, nga gjenocidi shtetëror serb. Për më tepër, Gjykata Speciale përmes Serbisë është derivat i raportit të rremë dhe të falsifikuar të Dick Martyt dhe kjo tanimë botërisht është e njohur”, ka thënë Bajrami.
Ndërkaq, profesori i së Drejtës Penale Ndërkombëtare, Ismet Salihu, tha se ndërkombëtarët në Kosovë nuk kanë shënuar asnjë rast ku ish-ushtarët e UÇK-së, kanë kryer krime ndaj serbëve.
“Pjesëtarët e UCK-së gjatë luftës të vitit 1998 deri në qershor të vitit 1999 nuk kanë kryer krime ndaj serbëve dhe pjesëtarëve të nacionaliteteve të tjera. Unë dhe as ndërkombëtarët nuk kemi shënuar asnjë rast ku pjesëtarët e UCK-së kanë hyrë në fshatra dhe vendbanime të tjera serbe dhe kanë kryer vrasje”, ka thënë Salihu.
E profesori Agim Zogaj, u shpreh tejet kritik për raportin e Dick Martyt.
“Tani gati pas pesë viteve prej ngritjes së aktakuzës, mbi bazën e këtyre trillimeve të Gjykatës Speciale kundër ish-krerëve të UÇK-së në asnjë paragraf përkatës nuk flitet për trafikim organesh dhe as për shtëpinë e verdhë. Dyshimet për trafikimin e organeve nuk u aprovuan asnjëherë. Asnjë nga aktakuzat nuk bëjnë asnjë referencë më të vogël për trafikimin e organeve”, ka thënë Zogaj.
Zyra e Prokurorit të Specializuar i ngarkon Thaçin dhe të tjerët me akuza për krime të pretenduara të luftës. Ata janë deklaruar të pafajshëm për të gjitha pikat e aktakuzës.
