Liga e Parë e futbollit në Kosovë nuk njeh pushim.
Këtë mesjavë, do të zhvillohet java e 13-të e kampionatit, me disa përballje mjaft interesante në kalendar.
Pa dyshim, sfida që bie më shumë në sy është derbi i madh mes Lirisë dhe Vëllaznimit – dy skuadra me histori, rivalitet të gjatë dhe tifozeri të zjarrta.
Vëllaznimi ndodhet aktualisht në vendin e dytë me 24 pikë, ndërsa Liria renditet në pozitën e shtatë me 20 pikë. Një humbje eventuale për skuadrën prizrenase do ta largonte edhe më shumë nga garat për tre vendet e para që sigurojnë ngjitjen në Superligë.
Një tjetër përballje e fortë do të zhvillohet në Vushtrri, ku skuadra vendase do të presë Istogun – një ekip në formë, që vjen pas fitores dërrmuese 6-0 ndaj KEK-ut.
Ndërkohë, Trepça ’89, që po kalon një formë të shkëlqyer, do të udhëtojë drejt Suharekës për një ndeshje që nuk pritet të jetë e lehtë, pasi vendasit kanë treguar stabilitet dhe dëshirë për të bërë surpriza me lojtarët e rinj në përbërje.
Feronikeli, një tjetër pretendent për ngjitje, do të kërkojë të rikthehet te fitorja pas dy humbjeve radhazi.
Ata do të përballen me 2 Korrikun, skuadra e fundit në renditje. Dinamo pret Kikën, ndërsa në Ferizaj pritet një duel i fortë dhe i paparashikueshëm mes Tefik Çangës dhe Ramiz Sadikut.
Trepça do të jetë mysafire e Vjosës në Shtime, një skuadër që vjen me moral të lartë pas fitores në Prizren.
Ndërkohë, në Pejë zhvillohet derbi lokal ndërmjet Rilindjes 1974 dhe Besës, që është në një krizë të thellë rezultatesh.
KEK-u, që vuan në fundin e tabelës, do të kërkojë të ringjallet në ndeshjen ndaj Prizrenit. Këto dy përballje pritet të jenë të rëndësishme për betejën e mbijetesës.
