Liga e Parë e Kosovës në futboll pritet të jetë më interesante se Superliga në sezonin 2025/26 për shkak se do të funksionojë si ligë e unifikuar dhe jo e ndarë në dy grupe.
Shorti për sezonin e ri në kategorinë e dytë të futbollit kosovar, është tërhequr të hënën në ambientet e Federatës së Futbollit të Kosovës.
Edhe Liga e Parë sikurse Superliga, nis më datën 16 gusht dhe duke pasur parasysh se do të garojnë 18 skuadra, sigurisht se xhiroja e parë do të ketë përballje të forta dhe interesante.
Megjithatë, derbi në nismë të Ligës së Parë, do të jetë ai ndërmjet Vëllaznimit dhe Feronikelit ’74, që do të zhvillohet në Gjakovë.
Duele tjera interesante të kësaj xhiroje, janë edhe Besa – Vushtrria e Rilindja – Liria e Prizrenit.
Çiftet tjera, të xhiros së parë në kategorinë e dytë të futbollit kosovar, janë: Prizreni – Trepça ’89, Trepça – Istogu, Ramiz Sadiku – 2 Korriku, Kika – KEK-u, Suhareka – Vjosa e Dinamo – Tefik Çanga.
