Skuadra shqiptare nga Maqedonia e Veriut, Shkëndija, e ka fituar ndeshjen e parë kundër Ararat Yerevanit, me rezultatin 2:0.
Ky ishte takimi i parë i raundit të parë kualifikues të Ligës së Konferencës, i cili u zhvillua në Shkup.
Ekipi tetovar ka krijuar epërsi të mirë para duelit të kthimit që zhvillohet pas një jave në Armeni.
Adenis Shala shënoi golin e parë për Shkëndijën në minutën e 21-të. Futbollisti nga Kosova realizoi nga afërsia. Për 2:0 u përkujdes Valmir Nafiu me një gol të bukur nga distanca në minutën e fundit të pjesës së parë. Në pjesën e dytë nuk pati ndryshim rezultati.
Ndërsa Deçiqi i Tuzit ka barazuar në ndeshjen e parë, ku luajti 1:1 me Dinamo Minskun.
Skuadra bjelloruse, Dinamo, ishte vendase, por vendosi që ndeshjen ta organizoi në Podgoricë.
Skuadrat bjelloruse janë urdhëruar që të luajnë në terren neutral dhe pa praninë e shikuesve.
Stefan Benkoviq kaloi në epërsi 1:0 Deçiqin në minutën e 26-të. Por menjëherë në minutën e 33-të, Dinamo Minsku barazoi shifrat në 1:1.
Gola të tjerë nuk u realizuan. Ndeshja e dytë luhet pas një jave po në Podgoricë.
