Nga 1 qershori kompanitë e mëdha kanë dalë në treg të hapur të energjisë elektrike.
Kësisoj bizneset që kanë më shumë se 10 milionë euro qarkullim në vit, paguajnë rrymën me tarifa jo të rregulluara.
Sipas Ligjit për energji elektrike, këto biznese është dashur të zgjedhin vetë se nga cila kompani dëshirojnë të furnizohen me energji elektrike.
Kjo pati sjellë ankesa të shumta nga bizneset të cilat iu janë drejtuar edhe institucionet e drejtësisë.
E sipas Odës Ekonomike të Kosovës, pasojat e liberalizimit të energjisë elektrike vecse janë duke u vërejtur
“Faturat bizneset vec si i kanë pranuar me rritje dhe të dhënat e ASK tregojnë se inflacioni ka kaluar në 4.5%, krahasuar me vitin e kaluar kur nuk kemi pas dalje në treg të lirë ose rritje të fatura të energjisë elektrike. Kjo i ka varfëruar qytetarët, pasi janë duke e vërejtur përmes inflacioni shihini të dhënat e fundit të ASK-së dhe faktorët kryesore që kanë ndiku në rritje të inflacionit është dalja në treg të lirë apo rritja e çmimit të energjisë elektrike”, tregon Lulëzim Rafuna nga OEK.
Nga Oda Ekonomike kanë bërë të ditur se me 5 nëntor do të përballen me Zyrën e Rregullatorit në Gjykatën Supreme.
Sipas kryetarit të kësaj Ode, liberalizimi i energjisë elektrike ka ndikuar edhe tek investitorët e huaj.
“Dalja në treg të lirë nuk është element motivues për investitorët e huaj që të vijnë në Kosovë të investojnë . Tashti çështja e energjisë elektrike, paralele me çështjen e sigurisë është bërë një jo element motivues për të ardhur në Kosovë dhe të investohet”, tha ai.
Kurse sipas ekspertit të energjisë elektrike, Vezir Rexhepi, Kosova ende nuk i ka plotësuar kushtet për dalje në treg të lirë.
“Në këtë periudhë që po flasim mendoj që nuk i ka plotësuar ende kushtet, kriteret, duke pasur parasysh edhe kapacitetet që ka Kosova në prodhimin e energjisë elektrike dhe ofertat e mundshme me kapacitet e mjaftueshme me kërkesën për mbulimin e konsumit sidomos të konsumatorëve që janë në treg të hapur”.
Madje, sipas tij, faturat e bizneseve pritet të rriten gjatë dimrit, kur konsumi është më i madh.
“Gjatë dimrit ngarkesa është shumë e madhe edhe për konsumatorët e zakonshme por edhe atyre industrial dhe gjithë konsumatorë që janë në treg të hapur. Kjo varet shumë edhe nga faktorët e jashtme se si do të jetë çmimi në bursën energjetike në Evrope, unë mendoj që kërkesa është shumë e madhe gjatë dimrit dhe besoj që mund të ketë vështirësi dhe mund të ketë rritje të çmimit në kohën e dimrit duke pasur parasysh gjithmonë mundësin apo mbulimin që ofron llojshmëria e burimeve energjetike në Kosovë”, tha eksperti i energjisë.
Bizneset dy herë radhazi kishin organizuar protestë, dukë kundërshtuar kështu daljen e menjëhershëm në treg të lirë, pa një faze të tranzicionit.
